වේනමුල්ල සමාජ සේවා භික්ෂු අභ්‍යාස ආයතනය ආරම්භ කිරීමේ අරමුණ වූයේ සමාජ සේවාවෙහි භික්ෂූන් වහන්සේලා පුහුණු කිරීම වන අතර එහි සාර අවධිය ලෙස මෙම ගතවන යුගය පෙන්වා දිය හැක. පිරිවෙන් ක්ෂේත්‍රයට මනා පුහුණුවකින් යුක්ත භික්ෂුවක් මනා පුහුණුවකින් හා උචිත පෞරුෂයකින් යුතු ගුරුවරයකු ලෙස යොමු කිරීම අප වගකීමක් වශයෙන් සලකන්නකි. එසේ ම භික්ෂූත්වය යන්නත් පරිවෙනාචාර්‍ය සේවය යනු කුමක් ද යන්න පිළිබඳවත් මනා අවබෝධයකින් කටයුතු කරන අප ලංකාවේ පිරිවෙන් ක්ෂේත්‍රයට පූර්’ව සේවා ගුරුවරුන් බිහි කරන එකම ආයතනය ද වේ. තව ද පුහුණු ගුරු ක්ෂේත්‍රයේ ඉහළම පිළිගැනීමක් සහිත එකම සහ හොඳම ආයතනය අප වේනමුල්ල සමාජ සේවා භික්ෂු අභ්‍යාස ආයතනය බව අදාළ ආයතන මගින් සනාථ කොට ඇති බවත් මහත් සතුටින් පවසන්නෙමු. ඔබටත් අප ආයතනය හා එක් ව අධ්‍යයන කටයුතුවල නිරතවීමට ආරාධනා.
සමාජ සේවාවෙහි භික්ෂූන් වහන්සේලා පුහුණු කිරීම සමාජ සේවා භික්ෂු අභ්‍යාස ආයතනයේ මූලික ආරම්භක පරමාර්ථය වූ අතර එය පොදුවේ ශිෂ්‍ය කණ්ඩායම ම එකතු වී මුල් කාලීනව ආයතනික මූලිකත්වයෙන් සිදු කළ අතර 2018 වසරේ සිට එක් එක් ශිෂ්‍යයකු ආයතනික මග පෙන්වීම යටතේ තනි තනිව යම් සමාජ සේවා කටයුත්තක් සිදු කළ යුතු අතර ඒ ඇසුරෙන් ක්‍රියාමූලික පර්‍යේෂණ නිබන්ධය සැකසීම ද කළ යුතු ය. මේ අනුව සමාජමය ගැටලුවකට විසඳුමක් සැපයීමටත් ඒ ඇසුරෙන් ලබා ගන්නා අත්දැකීම් අත් විඳීමටත් ශිෂ්‍යයාට අවස්ථාව ලබා දී ඇත. මීට අමතරව ආයතනය මගින් සිදු කරනු ලබන සාමූහික සමාජ සේවාවන් ද ඇත. එම වැඩසටහන් ලෙස ආයුර්වේද වෛද්‍ය සායනය, ආයුර්වේදී තෛලයක් සිඳීම, පෝය දින වැඩසටහන්, වැඩිහිටි නිවාස ආදී අවශ්‍යතා සහිත ස්ථාන සඳහා දායකත්වය සැපයීම ආදිය ඒ අතරින් කිහිපයක් දැක්විය හැක.
බඹරකු මලකින් රොන් ගන්නා සේ භික්ෂුවක් දායකයන් විෂයෙහි කටයුතු කළ යුතු බව ගෞතමයාණන් වහන්සේ දක්වා ඇත. එහෙයින් භික්ෂුවක් හුදෙක් පාංසුකූල, දාන මාන, බණ ආදිය පමණක්ම නොව සමාජීය වශයෙන් යම් ගැටලුවක් ඇත්නම් ඒ සඳහා විසඳුමක් දීමෙහි ප්‍රමුඛයා ද වන්නේය. එහෙයින් සහ වියැඛී යන භික්ෂු පෞරුෂය තරුණ භික්ෂු පරපුර තුළ නගා සිටුවීම ද මෙම සමාජ සේවා ව්‍යාපෘතිවල අරමුණක් වෙයි.
